اب دعاؤں میں نہیں کوئی اثر

اب دعاؤں میں نہیں کوئی اثر

بے یقینی کر گئی ہے دل میں گھر

دل کی کچھ اپنی ہی توجیہات ہیں

ہے مذبذب عقل جن سے بے خبر

حضرت انسان رو رو مر مٹا

پر مقدر کا تغافل الحذر

خواہشوں کے بت سلامت رہ گئے

چند کنکر مار آئے سب مگر

تیرگی اپنا مقدر تو نہیں

شب گزیدہ کیوں رہے اپنی سحر

آرزوئیں ہو گئیں جتنی طویل

عمر اتنی ہو گئی ہے مختصر

عقل ہو دل کے تسلط میں اگر

گفتگو کے سب دلائل بے ثمر

چل ہدایتؔ اس نگر میں جا بسیں

ہوں ستم گر بھی جہاں کے چارہ گر