اب غرض مے سے نہ مینا سے نہ پیمانے سے (ردیف .. ی)

اب غرض مے سے نہ مینا سے نہ پیمانے سے

ساقیا ہو گئی نفرت ترے میخانے سے

دل کو ہے عشق میں پہلے ہی سے الجھن کافر

اور الجھے نہ تری زلف کے سلجھانے سے

میرا ایمان گیا دل بھی گیا جاں بھی گئی

یہ سب آفت ہوئی اس آنکھ کے لڑ جانے سے

رنج ہجراں غم فرقت الم وصل عدو

دم کے ہیں ساتھ مرے جائیں گے دم جانے سے

ناصحا میں بھی کچھ ایسا نہیں نادان کہ بس

چھوڑ دوں راہ محبت ترے بہکانے سے

ساتھ جاتی دل محزوں کے جو یہ جان حزیں

چھوٹ جاتا میں شب و روز کے غم کھانے سے

لطفؔ کس طرح کرے فکر وصال جاناں

ایک دم کی نہیں فرصت اسے غم کھانے کی