ab gharaz mai se na mina se na paimane se

ab ġharaz mai se na miinā se na paimāne se

sāqiyā ho ga.ī nafrat tire maiḳhāne se

dil ko hai ishq meñ pahle hī se uljhan kāfir

aur uljhe na tirī zulf ke suljhāne se

merā īmān gayā dil bhī gayā jaañ bhī ga.ī

ye sab aafat huī us aañkh ke laḌ jaane se

ranj-e-hijrāñ ġham-e-furqat alam-e-vasl-e-adū

dam ke haiñ saath mire jā.eñge dam jaane se

nāsehā maiñ bhī kuchh aisā nahīñ nādān ki bas

chhoḌ duuñ rāh-e-mohabbat tire bahkāne se

saath jaatī dil-e-mahzūñ ke jo ye jān-e-hazīñ

chhūT jaatā maiñ shab-o-roz ke ġham khāne se

'lutf' kis tarah kare fikr-e-visāl-e-jānāñ

ek dam kī nahīñ fursat use ġham khāne kī

ab gharaz mai se na mina se na paimane se

saqiya ho gai nafrat tere maiKHane se

dil ko hai ishq mein pahle hi se uljhan kafir

aur uljhe na teri zulf ke suljhane se

mera iman gaya dil bhi gaya jaan bhi gai

ye sab aafat hui us aankh ke laD jaane se

ranj-e-hijran gham-e-furqat alam-e-wasl-e-adu

dam ke hain sath mere jaenge dam jaane se

naseha main bhi kuchh aisa nahin nadan ki bas

chhoD dun rah-e-mohabbat tere bahkane se

sath jati dil-e-mahzun ke jo ye jaan-e-hazin

chhuT jata main shab-o-roz ke gham khane se

'lutf' kis tarah kare fikr-e-visal-e-jaanan

ek dam ki nahin fursat use gham khane ki