ab ghaTaen chahiyen saqi na paimana mujhe

ab ghaTā.eñ chāhiyeñ saaqī na paimāna mujhe

us ke ġham ne kar diyā har ġham se begāna mujhe

ḳhatm kar denā hai ab vahshat kā afsāna mujhe

kah ga.e apnī zabāñ se vo bhī dīvāna mujhe

nahnu-aqrab kī sadā detī hai ḳhud manzil mirī

ab na ka.aba raah meñ roke na but-ḳhāna mujhe

dil meñ jab sham-e-haqīqat sho.ala-rū ho jā.egī

ḳhud jalā degī samajh kar apnā parvāna mujhe

kyā ġham-e-daurāñ kī bāteñ kyā sulūk-e-dostāñ

kyoñ sunātī hai ye duniyā merā afsāna mujhe

apnī kuTiyā kī rihā.ish par hai faḳhr-o-imbisāt

kyā lubhā.egā kisī kā qasr-e-shāhāna mujhe

is tarah ḳhush huuñ ki jaise 'shauq' sab kuchh de diyā

baḳhsh kar allāh ne ik dil faqīrāna mujhe

ab ghaTaen chahiyen saqi na paimana mujhe

us ke gham ne kar diya har gham se begana mujhe

KHatm kar dena hai ab wahshat ka afsana mujhe

kah gae apni zaban se wo bhi diwana mujhe

nahnu-aqrab ki sada deti hai KHud manzil meri

ab na kaba rah mein roke na but-KHana mujhe

dil mein jab sham-e-haqiqat shoala-ru ho jaegi

KHud jala degi samajh kar apna parwana mujhe

kya gham-e-dauran ki baaten kya suluk-e-dostan

kyon sunati hai ye duniya mera afsana mujhe

apni kuTiya ki rihaish par hai faKHr-o-imbisat

kya lubhaega kisi ka qasr-e-shahana mujhe

is tarah KHush hun ki jaise 'shauq' sab kuchh de diya

baKHsh kar allah ne ek dil faqirana mujhe