ab guzara nahin us shoKH ke dar par apna

ab guzārā nahīñ us shoḳh ke dar par apnā

jis ke ghar ko ye samajhte the ki hai ghar apnā

kūcha-e-dahr meñ ġhāfil na ho pāband-e-nashist

rahguzar meñ koī kartā nahīñ bistar apnā

ġham-zada uTh ga.e duniyā hī se ham āḳhir aah

zānū-e-ġham se va-lekin na uThā sar apnā

dekheñ kyā lahja-e-hastī ko ki juuñ āb-e-ravāñ

yaañ Thaharnā nazar aatā nahīñ dam bhar apnā

gar malūñ maiñ kaf-e-afsos to hañstā hai vo shoḳh

haath meñ haath kisī shaḳhs ke de kar apnā

vaa.e qismat ki rahe log bhī us paas na vo

zikr laate the kisī Dhab se jo aksar apnā

zab.h karnā thā to phir kyuuñ na mirī gardan par

zor se pher diyā aap ne ḳhanjar apnā

niim bismil hī chale chhoḌ ke tum kyuuñ pyāre

zor ye tum ne dikhāyā hameñ jauhar apnā

kyā kareñ dil jo kahe meñ ho to ham ai 'jur.at'

na kahīñ jaa.eñ ki hai sab se bhalā ghar apnā

ab guzara nahin us shoKH ke dar par apna

jis ke ghar ko ye samajhte the ki hai ghar apna

kucha-e-dahr mein ghafil na ho paband-e-nashist

rahguzar mein koi karta nahin bistar apna

gham-zada uTh gae duniya hi se hum aaKHir aah

zanu-e-gham se wa-lekin na uTha sar apna

dekhen kya lahja-e-hasti ko ki jun aab-e-rawan

yan Thaharna nazar aata nahin dam bhar apna

gar malun main kaf-e-afsos to hansta hai wo shoKH

hath mein hath kisi shaKHs ke de kar apna

wae qismat ki rahe log bhi us pas na wo

zikr late the kisi Dhab se jo aksar apna

zabh karna tha to phir kyun na meri gardan par

zor se pher diya aap ne KHanjar apna

nim bismil hi chale chhoD ke tum kyun pyare

zor ye tum ne dikhaya hamein jauhar apna

kya karen dil jo kahe mein ho to hum ai 'jurat'

na kahin jaen ki hai sab se bhala ghar apna