ab hai tufan muqabil to KHuda yaad aaya

ab hai tūfān muqābil to ḳhudā yaad aaya

ho gayā duur jo sāhil to ḳhudā yaad aaya

aql kī rāhnumā.ī kā bharam TuuT gayā

sāmne aa.e masā.il to ḳhudā yaad aaya

zindagī aish kī chhāñv meñ guzārī ham ne

jab na niklā koī hāsil to ḳhudā yaad aaya

kyoñ na jazbāt ke tūfāñ meñ sañbhālā ḳhud ko

rah gayā TuuT ke jab dil to ḳhudā yaad aaya

ham ne ḳhud sahl-pasandī kā shi.ār apnāyā

aa ga.e saḳht marāhil to ḳhudā yaad aaya

zindagī bhar na kiyā yaad use ham ne 'sadā'

aa ga.ī maut kī manzil to ḳhudā yaad aaya

ab hai tufan muqabil to KHuda yaad aaya

ho gaya dur jo sahil to KHuda yaad aaya

aql ki rahnumai ka bharam TuT gaya

samne aae masail to KHuda yaad aaya

zindagi aish ki chhanw mein guzari hum ne

jab na nikla koi hasil to KHuda yaad aaya

kyon na jazbaat ke tufan mein sanbhaala KHud ko

rah gaya TuT ke jab dil to KHuda yaad aaya

hum ne KHud sahl-pasandi ka shiar apnaya

aa gae saKHt marahil to KHuda yaad aaya

zindagi bhar na kiya yaad use hum ne 'sada'

aa gai maut ki manzil to KHuda yaad aaya