اب ہے طوفان مقابل تو خدا یاد آیا

اب ہے طوفان مقابل تو خدا یاد آیا

ہو گیا دور جو ساحل تو خدا یاد آیا

عقل کی راہنمائی کا بھرم ٹوٹ گیا

سامنے آئے مسائل تو خدا یاد آیا

زندگی عیش کی چھاؤں میں گزاری ہم نے

جب نہ نکلا کوئی حاصل تو خدا یاد آیا

کیوں نہ جذبات کے طوفاں میں سنبھالا خود کو

رہ گیا ٹوٹ کے جب دل تو خدا یاد آیا

ہم نے خود سہل پسندی کا شعار اپنایا

آ گئے سخت مراحل تو خدا یاد آیا

زندگی بھر نہ کیا یاد اسے ہم نے صداؔ

آ گئی موت کی منزل تو خدا یاد آیا