اب ہو کہ نہ ہو حشر میں دیدار کسی کا

اب ہو کہ نہ ہو حشر میں دیدار کسی کا

ہے ناز کہ میں بھی ہوں گنہ گار کسی کا

چلتا ہے کہیں وصل میں انکار کسی کا

اب آج کی شب عذر ہے بے کار کسی کا

کہتا ہے جسے ایک جہاں حسرت دیدار

آنکھوں میں لیے جاتا ہے بیمار کسی کا

موقع سے ملے کوئی تو دونوں ہیں برابر

اقرار کسی کا نہ کچھ انکار کسی کا

کیوں حور دم نزع لئے جام کھڑی ہے

کافی ہے مجھے شربت دیدار کسی کا

ایمان سے پوچھو تو خطا کوئی نہیں ہے

اک جرم وفا پر ہوں گنہ گار کسی کا

ہیں ایک ہی شیشے میں بندھے شیخ و برہمن

تسبیح کسی کی ہے نہ زنار کسی کا

ہم دیں گے اسے جان بھی ایمان بھی صفدرؔ

اس میں تو اجارہ نہیں اے یار کسی کا