ab ho ki na ho hashr mein didar kisi ka

ab ho ki na ho hashr meñ dīdār kisī kā

hai naaz ki maiñ bhī huuñ gunahgār kisī kā

chaltā hai kahīñ vasl meñ inkār kisī kā

ab aaj kī shab uzr hai bekār kisī kā

kahtā hai jise ek jahāñ hasrat-e-dīdār

āñkhoñ meñ liye jaatā hai bīmār kisī kā

mauqe se mile koī to donoñ haiñ barābar

iqrār kisī kā na kuchh inkār kisī kā

kyuuñ huur dam-e-naz.a liye jaam khaḌī hai

kaafī hai mujhe sharbat-e-dīdār kisī kā

īmān se pūchho to ḳhatā koī nahīñ hai

ik jurm-e-vafā par huuñ gunahgār kisī kā

haiñ ek hī shīshe meñ bañdhe shaiḳh-o-barahman

tasbīh kisī kī hai na zunnār kisī kā

ham deñge use jaan bhī īmān bhī 'safdar'

is meñ to ijāra nahīñ ai yaar kisī kā

ab ho ki na ho hashr mein didar kisi ka

hai naz ki main bhi hun gunahgar kisi ka

chalta hai kahin wasl mein inkar kisi ka

ab aaj ki shab uzr hai bekar kisi ka

kahta hai jise ek jahan hasrat-e-didar

aankhon mein liye jata hai bimar kisi ka

mauqe se mile koi to donon hain barabar

iqrar kisi ka na kuchh inkar kisi ka

kyun hur dam-e-naza liye jam khaDi hai

kafi hai mujhe sharbat-e-didar kisi ka

iman se puchho to KHata koi nahin hai

ek jurm-e-wafa par hun gunahgar kisi ka

hain ek hi shishe mein bandhe shaiKH-o-barahman

tasbih kisi ki hai na zunnar kisi ka

hum denge use jaan bhi iman bhi 'safdar'

is mein to ijara nahin ai yar kisi ka