ab husn-o-ishq ke bhi qisse badal gae hain

ab husn-o-ishq ke bhī qisse badal ga.e haiñ

manzil thī ek lekin raste badal ga.e haiñ

kis par yaqīn kiije ye daur matlabī hai

lagtā hai ḳhuun ke bhī rishte badal ga.e haiñ

āñkheñ batā rahī haiñ zāhir hai haal dil kā

vo bevafā nahīñ the kitne badal ga.e haiñ

ham jānte haiñ phir bhī pahchānñā hai mushkil

kuchh dostoñ ke itne chehre badal ga.e haiñ

un ko pata thā shāyad ik din lagegī Thokar

achchhā hai vaqt se vo pahle badal ga.e haiñ

jab se milī hai daulat ādāb bhuul baiThe

ab bāt-chīt ke bhī lahje badal ga.e haiñ

hai vaqt kā taqāza chup-chāp ghar meñ rahiye

chāhat vafā mohabbat jazbe badal ga.e haiñ

ma.asūmiyat kahīñ par gum ho ga.ī hai 'aḳhtar'

lagtā hai shahr jā kar bachche badal ga.e haiñ

ab husn-o-ishq ke bhi qisse badal gae hain

manzil thi ek lekin raste badal gae hain

kis par yaqin kije ye daur matlabi hai

lagta hai KHun ke bhi rishte badal gae hain

aankhen bata rahi hain zahir hai haal dil ka

wo bewafa nahin the kitne badal gae hain

hum jaante hain phir bhi pahchanna hai mushkil

kuchh doston ke itne chehre badal gae hain

un ko pata tha shayad ek din lagegi Thokar

achchha hai waqt se wo pahle badal gae hain

jab se mili hai daulat aadab bhul baiThe

ab baat-chit ke bhi lahje badal gae hain

hai waqt ka taqaza chup-chap ghar mein rahiye

chahat wafa mohabbat jazbe badal gae hain

masumiyat kahin par gum ho gai hai 'aKHtar'

lagta hai shahr ja kar bachche badal gae hain