ab imtiyaz-e-jalwa-gah-o-jalwa-gar kahan

ab imtiyāz-e-jalva-gah-o-jalva-gar kahāñ

merī nazar meñ parda-e-shams-o-qamar kahāñ

vo dil kā iztirāb vo saudā-e-sar kahāñ

ab is bashar meñ koī kamāl-e-bashar kahāñ

josh-e-junūn-e-shauq meñ ab ye ḳhabar kahāñ

manzil kahāñ hai raah kahāñ rāhbar kahāñ

sadqe thī jis pe rif.at-e-arsh-e-barīñ kabhī

vo bāl-o-par vo hausla-e-bāl-o-par kahāñ

merī jabīñ ko ḳhāk-e-dar o sang-e-dar mile

un ke harīm-e-husn meñ dīvār-o-dar kahāñ

āñkheñ uThā ke dekh asīr-e-shuā tū

dekhā hai tū ne partav-e-husn-e-bashar kahāñ

hai naġhma-rez sāz-e-hayāt aaj bhī yahāñ

lekin vo gosh-e-hosh-o-dil-e-bā-ḳhabar kahāñ

mai bhī vahī hai jaam vahī mai-kada vahī

in mai-kashoñ pe mai kā magar vo asar kahāñ

miltī thī jis se ġhuncha-o-gul ko hayāt-e-nau

ab vo nasīm-e-sub.h vo bād-e-sahar kahāñ

aañsū bahā ke jān-e-masarrat kī bazm meñ

tū ne Dubo diyā mujhe ai chashm-e-tar kahāñ

vo farsh-e-ḳhāk aur kahāñ ye maqām-e-quds

laa.e mujhe kahāñ se mire bāl-o-par kahāñ

ab to har ek ḳhair hai 'amjad' asīr-e-shar

is daur-e-ġham meñ ma.arka-e-ḳhair-o-shar kahāñ

ab imtiyaz-e-jalwa-gah-o-jalwa-gar kahan

meri nazar mein parda-e-shams-o-qamar kahan

wo dil ka iztirab wo sauda-e-sar kahan

ab is bashar mein koi kamal-e-bashar kahan

josh-e-junun-e-shauq mein ab ye KHabar kahan

manzil kahan hai rah kahan rahbar kahan

sadqe thi jis pe rifat-e-arsh-e-barin kabhi

wo baal-o-par wo hausla-e-baal-o-par kahan

meri jabin ko KHak-e-dar o sang-e-dar mile

un ke harim-e-husn mein diwar-o-dar kahan

aankhen uTha ke dekh asir-e-shua tu

dekha hai tu ne partaw-e-husn-e-bashar kahan

hai naghma-rez saz-e-hayat aaj bhi yahan

lekin wo gosh-e-hosh-o-dil-e-ba-KHabar kahan

mai bhi wahi hai jam wahi mai-kada wahi

in mai-kashon pe mai ka magar wo asar kahan

milti thi jis se ghuncha-o-gul ko hayat-e-nau

ab wo nasim-e-subh wo baad-e-sahar kahan

aansu baha ke jaan-e-masarrat ki bazm mein

tu ne Dubo diya mujhe ai chashm-e-tar kahan

wo farsh-e-KHak aur kahan ye maqam-e-quds

lae mujhe kahan se mere baal-o-par kahan

ab to har ek KHair hai 'amjad' asir-e-shar

is daur-e-gham mein marka-e-KHair-o-shar kahan