ab jam nigahon ke nasha kyun nahin dete

ab jaam nigāhoñ ke nasha kyuuñ nahīñ dete

ab bol mohabbat ke mazā kyuuñ nahīñ dete

tum khol ke zulfoñ ko uḌā kyuuñ nahīñ dete

tum shaan ghaTāoñ kī ghaTā kyuuñ nahīñ dete

ik ghūñT kī ummīd samundar se nahīñ jab

phir aag samundar meñ lagā kyuuñ nahīñ dete

hai muntazir-e-hashr bahut der se duniyā

ghuñghrū tire pairoñ ke sadā kyuuñ nahīñ dete

ye dhuup rahegī to ye rusvā.ī karegī

sūraj ko gunahgār bujhā kyuuñ nahīñ dete

tum dūsre logoñ pe na rakkhā karo ilzām

har baat meñ tum merī ḳhatā kyuuñ nahīñ dete

qātil kā hai kyā naam ye sab pūchh rahe haiñ

kyā ham bhī haiñ hamnām batā kyuuñ nahīñ dete

tum ko mire andāz-e-vafā se hai shikāyat

tum mujh ko vafā kar ke dikhā kyuuñ nahīñ dete

jo log 'alīm' apnī jagah miir bane haiñ

ash.ār ko vo tarz-e-adā kyuuñ nahīñ dete

ab jam nigahon ke nasha kyun nahin dete

ab bol mohabbat ke maza kyun nahin dete

tum khol ke zulfon ko uDa kyun nahin dete

tum shan ghaTaon ki ghaTa kyun nahin dete

ek ghunT ki ummid samundar se nahin jab

phir aag samundar mein laga kyun nahin dete

hai muntazir-e-hashr bahut der se duniya

ghunghru tere pairon ke sada kyun nahin dete

ye dhup rahegi to ye ruswai karegi

suraj ko gunahgar bujha kyun nahin dete

tum dusre logon pe na rakkha karo ilzam

har baat mein tum meri KHata kyun nahin dete

qatil ka hai kya nam ye sab puchh rahe hain

kya hum bhi hain hamnam bata kyun nahin dete

tum ko mere andaz-e-wafa se hai shikayat

tum mujh ko wafa kar ke dikha kyun nahin dete

jo log 'alim' apni jagah mir bane hain

ashaar ko wo tarz-e-ada kyun nahin dete