ab jald ye be-abi-e-mausam ki bala jae

ab jald ye be-ābī-e-mausam kī balā jaa.e

ashjār kī fariyād se sailāb na aa jaa.e

itnā bhī lahū ko na junūñ-ḳhez kiyā jaa.e

phūTe rag-e-gul se to rag-e-sañg meñ aa jaa.e

bārish hai to aisī ki laraz jaa.e zamīñ bhī

paanī hai ki miTTī ko bhī talvār banā jaa.e

log aise ki siine kī kapaT shīshe pe likh deñ

ham aise ki patthar ko bhī patthar na kahā jaa.e

itnā bhī na ho sehn ki dar tak maiñ pahuñch kar

dar kholūñ to darvesh-e-duā-go hī chalā jaa.e

apnā hī lahū qātil-e-tahzīb-o-nasab hai

is shahr meñ kis kis se ḳhabar-dār rahā jaa.e

ab jald ye be-abi-e-mausam ki bala jae

ashjar ki fariyaad se sailab na aa jae

itna bhi lahu ko na junun-KHez kiya jae

phuTe rag-e-gul se to rag-e-sang mein aa jae

barish hai to aisi ki laraz jae zamin bhi

pani hai ki miTTi ko bhi talwar bana jae

log aise ki sine ki kapaT shishe pe likh den

hum aise ki patthar ko bhi patthar na kaha jae

itna bhi na ho sehn ki dar tak main pahunch kar

dar kholun to darwesh-e-dua-go hi chala jae

apna hi lahu qatil-e-tahzib-o-nasab hai

is shahr mein kis kis se KHabar-dar raha jae