ab jo barsa abr-e-gham aisa kabhi barsa nahin

ab jo barsā abr-e-ġham aisā kabhī barsā nahīñ

dil bhī Duubā saath meñ ghar hī faqat Duubā nahīñ

ai thake-māñde musāfir jā yahāñ se duur jā

vaqt vo dīvār hai jis kā kahīñ saayā nahīñ

kyā tamāsha hai ki ab har shaḳhs ko ye vahm hai

sab se maiñ ūñchā huuñ mujh se koī bhī ūñchā nahīñ

ab jo pahchāne to kyūñkar koī pahchāne mujhe

baat itnī hai ki ye chehra mirā chehra nahīñ

qaid kar letī hai mujh ko kyoñ chaman kī har kalī

maiñ faqat rang-e-chaman huuñ bū-e-āvāra nahīñ

dīda-o-dil ke darīche band kar so jā 'shamīm'

rang-o-bū kā aaj bhī jhoñkā idhar aaya nahīñ

ab jo barsa abr-e-gham aisa kabhi barsa nahin

dil bhi Duba sath mein ghar hi faqat Duba nahin

ai thake-mande musafir ja yahan se dur ja

waqt wo diwar hai jis ka kahin saya nahin

kya tamasha hai ki ab har shaKHs ko ye wahm hai

sab se main uncha hun mujh se koi bhi uncha nahin

ab jo pahchane to kyunkar koi pahchane mujhe

baat itni hai ki ye chehra mera chehra nahin

qaid kar leti hai mujh ko kyon chaman ki har kali

main faqat rang-e-chaman hun bu-e-awara nahin

dida-o-dil ke dariche band kar so ja 'shamim'

rang-o-bu ka aaj bhi jhonka idhar aaya nahin