اب جو برسا ابر غم ایسا کبھی برسا نہیں

اب جو برسا ابر غم ایسا کبھی برسا نہیں

دل بھی ڈوبا ساتھ میں گھر ہی فقط ڈوبا نہیں

اے تھکے ماندے مسافر جا یہاں سے دور جا

وقت وہ دیوار ہے جس کا کہیں سایا نہیں

کیا تماشہ ہے کہ اب ہر شخص کو یہ وہم ہے

سب سے میں اونچا ہوں مجھ سے کوئی بھی اونچا نہیں

اب جو پہچانے تو کیونکر کوئی پہچانے مجھے

بات اتنی ہے کہ یہ چہرہ مرا چہرہ نہیں

قید کر لیتی ہے مجھ کو کیوں چمن کی ہر کلی

میں فقط رنگ چمن ہوں بوئے آوارہ نہیں

دیدہ و دل کے دریچے بند کر سو جا شمیمؔ

رنگ و بو کا آج بھی جھونکا ادھر آیا نہیں