ab jo bikhre bhi to chamkenge sitaron ki tarah

ab jo bikhre bhī to chamkeñge sitāroñ kī tarah

ik numā.ish hī sahī ā.īna-pāroñ kī tarah

sard jhoñke kī himāqat pe vo Daalī kī lachak

mujh ko lagtī tire ma.asūm ishāroñ kī tarah

yaad aate haiñ jo barsāt meñ bhīge lamhe

zaḳhm rah-rah ke damakte haiñ sharāroñ kī tarah

tere gesū tire abrū tirī pur-shoḳh nazar

merī ġhazloñ meñ chamakte haiñ sitāroñ kī tarah

muntazir koī mile mujh ko bhī pyāsī dhartī

maiñ bhī dil khol ke barsūñgā bahāroñ kī tarah

us kī yādoñ se hai raushan mire dil kī bastī

mere mahbūb ke pur-nūr dayāroñ kī tarah

ziist guzrī hai mirī ġham ke thapeḌe sah kar

kisī sāgar ke sahanshīl kināroñ kī tarah

jab tasavvur meñ ubhartā hai vo ḳhushbū sā badan

dil-e-vīrān sañvartā hai nazāroñ kī tarah

kabhī bhūle se mirā dard bharā dil na chhuā

yuuñ dikhāve ko to miltā hai vo pyāroñ kī tarah

yuuñ to aate haiñ mirī samt ka.ī ġham ke bhañvar

par duā.eñ haiñ mire gird hisāroñ kī tarah

ab jo bikhre bhi to chamkenge sitaron ki tarah

ek numaish hi sahi aaina-paron ki tarah

sard jhonke ki himaqat pe wo Dali ki lachak

mujh ko lagti tere masum ishaaron ki tarah

yaad aate hain jo barsat mein bhige lamhe

zaKHm rah-rah ke damakte hain shararon ki tarah

tere gesu tere abru teri pur-shoKH nazar

meri ghazlon mein chamakte hain sitaron ki tarah

muntazir koi mile mujh ko bhi pyasi dharti

main bhi dil khol ke barsunga bahaaron ki tarah

us ki yaadon se hai raushan mere dil ki basti

mere mahbub ke pur-nur dayaron ki tarah

zist guzri hai meri gham ke thapeDe sah kar

kisi sagar ke sahanshil kinaron ki tarah

jab tasawwur mein ubharta hai wo KHushbu sa badan

dil-e-viran sanwarta hai nazaron ki tarah

kabhi bhule se mera dard bhara dil na chhua

yun dikhawe ko to milta hai wo pyaron ki tarah

yun to aate hain meri samt kai gham ke bhanwar

par duaen hain mere gird hisaron ki tarah