ab kahan dost milen sath nibhane wale

ab kahāñ dost mileñ saath nibhāne vaale

sab ne sīkhe haiñ ab ādāb zamāne vaale

dil jalāo yā diye āñkhoñ ke darvāze par

vaqt se pahle to aate nahīñ aane vaale

ashk ban ke maiñ nigāhoñ meñ tirī ā.ūñgā

ai mujhe apnī nigāhoñ se girāne vaale

vaqt badlā to uThāte haiñ ab uñglī mujh par

kal talak haq meñ mire haath uThāne vaale

vaqt har zaḳhm kā marham to nahīñ ban saktā

dard kuchh hote haiñ tā-umr rulāne vaale

ik nazar dekh tū majbūriyāñ bhī to merī

ai mirī laġhzishoñ par aañkh Tikāne vaale

kaun kahtā hai bure kaam kā phal bhī hai burā

dekh masnad pe haiñ masjid ko girāne vaale

ye siyāsat hai ki la.anat hai siyāsat pe 'sadā'

ḳhud haiñ mujrim bane qānūn banāne vaale

ab kahan dost milen sath nibhane wale

sab ne sikhe hain ab aadab zamane wale

dil jalao ya diye aankhon ke darwaze par

waqt se pahle to aate nahin aane wale

ashk ban ke main nigahon mein teri aaunga

ai mujhe apni nigahon se girane wale

waqt badla to uThate hain ab ungli mujh par

kal talak haq mein mere hath uThane wale

waqt har zaKHm ka marham to nahin ban sakta

dard kuchh hote hain ta-umr rulane wale

ek nazar dekh tu majburiyan bhi to meri

ai meri laghzishon par aankh Tikane wale

kaun kahta hai bure kaam ka phal bhi hai bura

dekh masnad pe hain masjid ko girane wale

ye siyasat hai ki lanat hai siyasat pe 'sada'

KHud hain mujrim bane qanun banane wale