ab kahan le ke chhupen uryan badan aur tan jala

ab kahāñ le ke chhupeñ 'uryāñ badan aur tan jalā

dhuup aisī hai ki saa.e se bhī pairāhan jalā

chhīn lo ehsās mujh se chhīn lo merā shu'ūr

is ghaTā meñ tan phuñkā is raushnī se man jalā

zindagī dasht-e-sarāb aur sar pe ik sūraj muhīt

maiñ to maiñ huuñ mere saa.e kā bhī sab tan man jalā

kis sadā kī zarb se TuuTā sukūt-e-sañg-e-dasht

ek chingārī uḌī saarā kā saarā ban jalā

dil jo thā siine meñ bach sakte the kab ahl-e-ḳhirad

shahr meñ ik shor thā dāman jalā dāman jalā

dil-dukhoñ kī ḳhaak par kī shab-nashīnī maah ne

din kabhī niklā to ik sūraj sar-e-madfan jalā

tīrgī kī āñdhiyāñ uThtī rahīñ har nuur se

ik charāġh aisā hai siine meñ ki be-roġhan jalā

rafta rafta ho ga.e dast-e-talab ahl-e-junūñ

rāstoñ par sab liye baiThe haiñ ik dāman jalā

ghuT ke rah saktī thī kab tak ātish-e-rañg-e-bahār

zarb-e-mausam bhī kuchh aisī thī ki sab gulshan jalā

jal gayā to kyā huā āḳhir to maiñ kundan huā

ham-nashīñ dāman kī kyā jab man jalā dāman jalā

ab kahan le ke chhupen 'uryan badan aur tan jala

dhup aisi hai ki sae se bhi pairahan jala

chhin lo ehsas mujh se chhin lo mera shu'ur

is ghaTa mein tan phunka is raushni se man jala

zindagi dasht-e-sarab aur sar pe ek suraj muhit

main to main hun mere sae ka bhi sab tan man jala

kis sada ki zarb se TuTa sukut-e-sang-e-dasht

ek chingari uDi sara ka sara ban jala

dil jo tha sine mein bach sakte the kab ahl-e-KHirad

shahr mein ek shor tha daman jala daman jala

dil-dukhon ki KHak par ki shab-nashini mah ne

din kabhi nikla to ek suraj sar-e-madfan jala

tirgi ki aandhiyan uThti rahin har nur se

ek charagh aisa hai sine mein ki be-roghan jala

rafta rafta ho gae dast-e-talab ahl-e-junun

raston par sab liye baiThe hain ek daman jala

ghuT ke rah sakti thi kab tak aatish-e-rang-e-bahaar

zarb-e-mausam bhi kuchh aisi thi ki sab gulshan jala

jal gaya to kya hua aaKHir to main kundan hua

ham-nashin daman ki kya jab man jala daman jala