ab kaise rafu pairahan ho is aawara diwane ka

ab kaise rafū pairāhan ho is āvāra dīvāne kā

kyā jaane garebāñ hogā kahāñ dāman se baḌā vīrāne kā

vaa.iz na sunegā saaqī kī lālach hai use paimāne kā

mujh se hoñ agar aisī bāteñ maiñ naam na luuñ maiḳhāne kā

kyā jaane kahegā kyā aa kar hai daur yahāñ paimāne kā

allāh kare vaa.iz ko kabhī rasta na mile maiḳhāne kā

turbat se lagā kartā mahshar sunte haiñ koī miltā hī nahīñ

manzil hai baḌī ābādī kī rasta hai baḌā vīrāne kā

jannat meñ piyegā kyūñkar ai shaiḳh yahāñ gar mashq na kī

ab maane na maane terī ḳhushī hai kaam mirā samjhāne kā

jī chāhā jahāñ par ro diyā hai paañv meñ chubhe aur TuuT ga.e

ḳhāroñ ne bhī dil meñ soch liyā hai kaun yahāñ dīvāne kā

haiñ tañg tirī mai-kash saaqī ye paḌh ke namāz aatā hai yahīñ

yā shaiḳh kī tauba tuḌvā de yā vaqt badal maiḳhāne kā

har sub.h ko aah sar se dil-e-shādāb jarāhat rahtā hai

gar yuuñ hī rahegī bād-e-sahar ye phuul nahīñ murjhāne kā

bahke hue vaa.iz se mil kar kyuuñ baiThe hue ho mai-ḳhvāro

gar toḌ de ye sab jām-o-subū kyā kar loge dīvāne kā

ahbāb ye tum kahte ho bajā vo bazm-e-adū meñ baiThe haiñ

vo aa.eñ na aa.eñ un kī ḳhushī charchā to karo mar jaane kā

us vaqt khulegā his ko bhī ehsās-e-mohabbat hai ki nahīñ

jab sham.a sar-e-mahfil ro kar muñh dekhegī parvāne kā

bādal ke añdhere meñ chhup kar maiḳhāne meñ aa baiThā hai

gar chāñdnī ho jā.egī 'qamar' ye shaiḳh nahīñ phir jaane kā

ab kaise rafu pairahan ho is aawara diwane ka

kya jaane gareban hoga kahan daman se baDa virane ka

waiz na sunega saqi ki lalach hai use paimane ka

mujh se hon agar aisi baaten main nam na lun maiKHane ka

kya jaane kahega kya aa kar hai daur yahan paimane ka

allah kare waiz ko kabhi rasta na mile maiKHane ka

turbat se laga karta mahshar sunte hain koi milta hi nahin

manzil hai baDi aabaadi ki rasta hai baDa virane ka

jannat mein piyega kyunkar ai shaiKH yahan gar mashq na ki

ab mane na mane teri KHushi hai kaam mera samjhane ka

ji chaha jahan par ro diya hai panw mein chubhe aur TuT gae

KHaron ne bhi dil mein soch liya hai kaun yahan diwane ka

hain tang teri mai-kash saqi ye paDh ke namaz aata hai yahin

ya shaiKH ki tauba tuDwa de ya waqt badal maiKHane ka

har subh ko aah sar se dil-e-shadab jarahat rahta hai

gar yun hi rahegi baad-e-sahar ye phul nahin murjhane ka

bahke hue waiz se mil kar kyun baiThe hue ho mai-KHwaro

gar toD de ye sab jam-o-subu kya kar loge diwane ka

ahbab ye tum kahte ho baja wo bazm-e-adu mein baiThe hain

wo aaen na aaen un ki KHushi charcha to karo mar jaane ka

us waqt khulega his ko bhi ehsas-e-mohabbat hai ki nahin

jab shama sar-e-mahfil ro kar munh dekhegi parwane ka

baadal ke andhere mein chhup kar maiKHane mein aa baiTha hai

gar chandni ho jaegi 'qamar' ye shaiKH nahin phir jaane ka