اب کے ایسا حشر بپا ہے دل کے اندر روتے ہیں

اب کے ایسا حشر بپا ہے دل کے اندر روتے ہیں

میری آنکھوں کی وسعت پر سات سمندر روتے ہیں

میں نے اپنے بچپن ہی میں وہ سرمایہ دفن کیا

جس کی خاطر اب تک میرے دیوار و در روتے ہیں

خواب میں ہم کو اکثر اک تصویر دکھائی جاتی ہے

پہلے خوش ہو جاتے ہیں پھر ٹوٹ کے اس پر روتے ہیں

وحشت شب اور دشت و صحرا دریا جنگل اور پہاڑ

یہ سارے تو مجھ سے یوں ہی روز لپٹ کر روتے ہیں

جانے کیسے لوگ تھے وہ جو ویرانے سے بچھڑ گئے

جن کے لئے آباد خرابے کے سب منظر روتے ہیں

اک خادم میں اتنی خوبی جب گنوائی جاتی ہے

اپنی اپنی قسمت پر پھر سارے سکندر روتے ہیں

آصفؔ صاحب ضبط کرو گے تو پاگل ہو جاؤ گے

اس دکھ پر تو اچھے اچھے مست قلندر روتے ہیں