ab ke aisa hashr bapa hai dil ke andar rote hain

ab ke aisā hashr bapā hai dil ke andar rote haiñ

merī āñkhoñ kī vus'at par saat samundar rote haiñ

maiñ ne apne bachpan hī meñ vo sarmāya dafn kiyā

jis kī ḳhātir ab tak mere dīvār-o-dar rote haiñ

ḳhvāb meñ ham ko aksar ik tasvīr dikhā.ī jaatī hai

pahle ḳhush ho jaate haiñ phir Tuut ke us par rote haiñ

vahshat-e-shab aur dasht-o-sahrā dariyā jangal aur pahāḌ

ye saare to mujh se yuuñ hī roz lipaT kar rote haiñ

jaane kaise log the vo jo vīrāne se bichhaḌ ga.e

jin ke liye ābād ḳharābe ke sab manzar rote haiñ

ik ḳhādim meñ itnī ḳhūbī jab ginvā.ī jaatī hai

apnī apnī qismat par phir saare sikandar rote haiñ

'āsif' sāhab zabt karoge to pāgal ho jāoge

is dukh par to achchhe achchhe mast qalandar rote haiñ

ab ke aisa hashr bapa hai dil ke andar rote hain

meri aankhon ki wus'at par sat samundar rote hain

main ne apne bachpan hi mein wo sarmaya dafn kiya

jis ki KHatir ab tak mere diwar-o-dar rote hain

KHwab mein hum ko aksar ek taswir dikhai jati hai

pahle KHush ho jate hain phir Tut ke us par rote hain

wahshat-e-shab aur dasht-o-sahra dariya jangal aur pahaD

ye sare to mujh se yun hi roz lipaT kar rote hain

jaane kaise log the wo jo virane se bichhaD gae

jin ke liye aabaad KHarabe ke sab manzar rote hain

ek KHadim mein itni KHubi jab ginwai jati hai

apni apni qismat par phir sare sikandar rote hain

'asif' sahab zabt karoge to pagal ho jaoge

is dukh par to achchhe achchhe mast qalandar rote hain