ab ke phir rah nai panw ke chhaale nae the

ab ke phir raah na.ī paañv ke chhāle na.e the

chārāgar bhī the na.e dekhne vaale na.e the

us kī chāhat meñ kamī aa na sakī vaqt ke saath

muddatoñ baad bhī kapḌe jo nikāle na.e the

vaqt ke saath badaltī hai suḳhan-fahmī bhī

maiñ vahī thā pa mere chāhne vaale na.e the

maiñ ne bhī tanz kī tarkīb badal kar rakh dī

par harīfoñ ne bhī jumle jo uchhāle na.e the

in charāġhoñ ko havāoñ ne sikhāyā hai zarūr

jin kī miTTī thī vahī jin ke ujāle na.e the

muttafiq kis tarah hotā maiñ tirī bātoñ se

na dalīleñ thiiñ na.ī aur na havāle na.e the

koī manzar tirī āñkhoñ ko bhalā kyā lagtā

maiñ ne dekhā thā ki un meñ paḌe jaale na.e the

maiñ kisī se koī shikva bhī karūñ to kyoñ kar

na na.e chāñd the mahfil meñ na haale na.e the

sach ko har daur meñ suulī pe chaḌhāyā sab ne

vaqt ke haath meñ suqrāt ke pyāle na.e the

muflisī khā ga.ī ummīd ke mausam kā surūr

maiñ ne vo ḳhvāb jo āñkhoñ se nikāle na.e the

ab ke phir rah nai panw ke chhaale nae the

chaaragar bhi the nae dekhne wale nae the

us ki chahat mein kami aa na saki waqt ke sath

muddaton baad bhi kapDe jo nikale nae the

waqt ke sath badalti hai suKHan-fahmi bhi

main wahi tha pa mere chahne wale nae the

main ne bhi tanz ki tarkib badal kar rakh di

par harifon ne bhi jumle jo uchhaale nae the

in charaghon ko hawaon ne sikhaya hai zarur

jin ki miTTi thi wahi jin ke ujale nae the

muttafiq kis tarah hota main teri baaton se

na dalilen thin nai aur na hawale nae the

koi manzar teri aankhon ko bhala kya lagta

main ne dekha tha ki un mein paDe jale nae the

main kisi se koi shikwa bhi karun to kyon kar

na nae chand the mahfil mein na haale nae the

sach ko har daur mein suli pe chaDhaya sab ne

waqt ke hath mein suqraat ke pyale nae the

muflisi kha gai ummid ke mausam ka surur

main ne wo KHwab jo aankhon se nikale nae the