ab ke qimar-e-ishq bhi Thahra ek hunar danai ka

ab ke qimār-e-ishq bhī Thahrā ek hunar dānā.ī kā

shauq bhī thā is khel kā ham ko ḳhauf bhī thā rusvā.ī kā

bas vahī ik be-kaif udāsī bas vahī banjar sannāTā

sau sau rañg milan ke dekhe ek hī rañg judā.ī kā

pyaar kī jañg meñ yaaro ham ne do hī ḳhadshe dekhe haiñ

pahle-pahal thā ḳhauf-e-asīrī ab hai ḳhauf rihā.ī kā

apnī havā meñ yuuñ phirtā thā jaise bagūla sahrā meñ

ham ne jab dekhā to ajab thā haal tire saudā.ī kā

ajnabī chehre takte rahnā shahr kī chaltī rāhoñ par

apnī samajh meñ ab aayā hai ye pahlū tanhā.ī kā

āñkheñ apnī band thiiñ jab tak haal pe apne ro.e bahut

aañkh khulī to dekhā haal yahī thā saarī ḳhudā.ī kā

dil kī zamīñ par bo.e the 'bāqar' biij jo dard judā.ī ke

chaliye ab vo fasl khaḌī hai vaqt aayā hai kaTā.ī kā

ab ke qimar-e-ishq bhi Thahra ek hunar danai ka

shauq bhi tha is khel ka hum ko KHauf bhi tha ruswai ka

bas wahi ek be-kaif udasi bas wahi banjar sannaTa

sau sau rang milan ke dekhe ek hi rang judai ka

pyar ki jang mein yaro hum ne do hi KHadshe dekhe hain

pahle-pahal tha KHauf-e-asiri ab hai KHauf rihai ka

apni hawa mein yun phirta tha jaise bagula sahra mein

hum ne jab dekha to ajab tha haal tere saudai ka

ajnabi chehre takte rahna shahr ki chalti rahon par

apni samajh mein ab aaya hai ye pahlu tanhai ka

aankhen apni band thin jab tak haal pe apne roe bahut

aankh khuli to dekha haal yahi tha sari KHudai ka

dil ki zamin par boe the 'baqar' bij jo dard judai ke

chaliye ab wo fasl khaDi hai waqt aaya hai kaTai ka