ab ke wahshat mein koi rah nikalunga main KHud

ab ke vahshat meñ koī raah nikālūñgā maiñ ḳhud

dasht vo de vahāñ dīvār banā lūñgā maiñ ḳhud

kyoñ koī mere parindoñ kī nigah-dārī kare

zaḳhm ḳhud paale haiñ to in ko sañbhālūñgā maiñ ḳhud

aap bas mujh ko mirā chaak ināyat kar deñ

apnī miTTī se koī shakl banā lūñgā maiñ ḳhud

mere ġhāsib se kaho merā ḳharāba mujhe de

ban paḌā mujh se to ye shahr basā lūñgā maiñ ḳhud

mere dushman se kaho āb-e-baqā hai to pilā.e

zahr kā kyā hai kisī roz ye khā lūñgā maiñ ḳhud

tujh se miltā koī mil jaa.e to ai jān-e-tilism

hū-bahū us ko tire jaisā banā lūñgā maiñ ḳhud

abr mushkil hai to chal sāya-e-dīvār hī de

jab chalūñgā to use saath chalā lūñgā maiñ ḳhud

log kahte haiñ mire harf-e-duā meñ hai asar

vāqa.ī hai to kabhī apnī duā lūñgā maiñ ḳhud

merī ustād hai ḳhud merī jibillat 'ahmad'

jaisī miTTī ho qadam apne jamā lūñgā maiñ ḳhud

ab ke wahshat mein koi rah nikalunga main KHud

dasht wo de wahan diwar bana lunga main KHud

kyon koi mere parindon ki nigah-dari kare

zaKHm KHud pale hain to in ko sanbhaalunga main KHud

aap bas mujh ko mera chaak inayat kar den

apni miTTi se koi shakl bana lunga main KHud

mere ghasib se kaho mera KHaraba mujhe de

ban paDa mujh se to ye shahr basa lunga main KHud

mere dushman se kaho aab-e-baqa hai to pilae

zahr ka kya hai kisi roz ye kha lunga main KHud

tujh se milta koi mil jae to ai jaan-e-tilism

hu-bahu us ko tere jaisa bana lunga main KHud

abr mushkil hai to chal saya-e-diwar hi de

jab chalunga to use sath chala lunga main KHud

log kahte hain mere harf-e-dua mein hai asar

waqai hai to kabhi apni dua lunga main KHud

meri ustad hai KHud meri jibillat 'ahmad'

jaisi miTTi ho qadam apne jama lunga main KHud