ab KHun ko mai qalb ko paimana kaha jae

ab ḳhuun ko mai qalb ko paimāna kahā jaa.e

is daur meñ maqtal ko bhī mai-ḳhāna kahā jaa.e

jo baat kahī jaa.e vo tevar se kahī jaa.e

jo sher kahā jaa.e harīfāna kahā jaa.e

har hoñT ko murjhāyā huā phuul samajhiye

har aañkh ko chhalkā huā paimāna kahā jaa.e

sunsān hue jaate haiñ ḳhvāboñ ke jazīre

ḳhvāboñ ke jazīroñ ko bhī vīrāna kahā jaa.e

vaa.iz ne jo farmāyā thā mehrāb-e-haram meñ

rindoñ se vo kyuuñ sāqi-e-mai-ḳhāna kahā jaa.e

tapte hue sahrā meñ bhī kuchh phuul khilā.eñ

kab tak lab-o-ruḳhsār kā afsāna kahā jaa.e

ham sub.h-e-bahārāñ kī tamāzat se jale haiñ

ham se gul o shabnam kā na afsāna kahā jaa.e

dīvāna har ik haal meñ dīvāna rahegā

farzāna kahā jaa.e ki dīvāna kahā jaa.e

maḳhdūm se ham ko bhī hai nisbat vahī 'manzūr'

rindoñ meñ jise nisbat-e-paimāna kahā jaa.e

ab KHun ko mai qalb ko paimana kaha jae

is daur mein maqtal ko bhi mai-KHana kaha jae

jo baat kahi jae wo tewar se kahi jae

jo sher kaha jae harifana kaha jae

har honT ko murjhaya hua phul samajhiye

har aankh ko chhalka hua paimana kaha jae

sunsan hue jate hain KHwabon ke jazire

KHwabon ke jaziron ko bhi virana kaha jae

waiz ne jo farmaya tha mehrab-e-haram mein

rindon se wo kyun saqi-e-mai-KHana kaha jae

tapte hue sahra mein bhi kuchh phul khilaen

kab tak lab-o-ruKHsar ka afsana kaha jae

hum subh-e-bahaaran ki tamazat se jale hain

hum se gul o shabnam ka na afsana kaha jae

diwana har ek haal mein diwana rahega

farzana kaha jae ki diwana kaha jae

maKHdum se hum ko bhi hai nisbat wahi 'manzur'

rindon mein jise nisbat-e-paimana kaha jae