ab KHwahish-e-talafi-e-mafat bhi gai

ab ḳhvāhish-e-talāfī-e-māfāt bhī ga.ī

jī meñ jo thī ik baat so vo baat bhī ga.ī

afkār-e-nau-ba-nau ne kiyā vaqt rā.egāñ

kin uljhanoñ meñ fursat-e-auqāt bhī ga.ī

radd-e-savāl se nahīñ be-ḳhauf arz-e-shauq

phir baat kyā kareñge agar baat bhī ga.ī

ahvāl-e-hāl hī ko muqaddar samajh liyā

lo aaj fikr-e-gardish-e-hālāt bhī ga.ī

haiñ sub.h ke hisāb meñ aḳhtar shumāriyāñ

chamkā na āftāb to kyā raat bhī ga.ī

hai aaj ābgīna-e-ehsās chuur chuur

jaane kahāñ ravānī-e-jazbāt bhī ga.ī

vo aaj kho gayā hai 'munavvar' hujūm meñ

ummīd-e-yār bahr-e-mulāqāt bhī ga.ī

ab KHwahish-e-talafi-e-mafat bhi gai

ji mein jo thi ek baat so wo baat bhi gai

afkar-e-nau-ba-nau ne kiya waqt raegan

kin uljhanon mein fursat-e-auqat bhi gai

radd-e-sawal se nahin be-KHauf arz-e-shauq

phir baat kya karenge agar baat bhi gai

ahwal-e-haal hi ko muqaddar samajh liya

lo aaj fikr-e-gardish-e-haalat bhi gai

hain subh ke hisab mein aKHtar shumariyan

chamka na aaftab to kya raat bhi gai

hai aaj aabgina-e-ehsas chur chur

jaane kahan rawani-e-jazbaat bhi gai

wo aaj kho gaya hai 'munawwar' hujum mein

ummid-e-yar bahr-e-mulaqat bhi gai