ab ki jo taza ghazal taza kahani likhna

ab kī jo taaza ġhazal taaza kahānī likhnā

hijr kī dard kī sā'at ko purānī likhnā

koī 'unvān ho tahrīr suhānī likhnā

dāstāñ kāñToñ kī phūloñ kī zabānī likhnā

Thos alfāz meñ sayyāl ma'ānī likhnā

zindagī bhāgte lamhoñ kī zabānī likhnā

vaise likh sakte haiñ har shai kī ravānī lekin

saḳht mushkil hai tabī'at kī ravānī likhnā

log kyā likhte haiñ kyā paḌhte haiñ is shahr meñ ab

rā.ij-ul-vaqt adīboñ kī kahānī likhnā

'ilm kā bojh ġhazal itnā nahīñ sah saktī

hai.at-e-nazm meñ apnī hama-dānī likhnā

isti'āre meñ 'alāmat meñ ishāre meñ kahīñ

aas kī yaas kī bharpūr javānī likhnā

ābshāroñ kā junūñ sāmne rakh kar 'vasfī'

chaḌhte dariyā kī bracket meñ ravānī likhnā

ab ki jo taza ghazal taza kahani likhna

hijr ki dard ki sa'at ko purani likhna

koi 'unwan ho tahrir suhani likhna

dastan kanTon ki phulon ki zabani likhna

Thos alfaz mein sayyal ma'ani likhna

zindagi bhagte lamhon ki zabani likhna

waise likh sakte hain har shai ki rawani lekin

saKHt mushkil hai tabi'at ki rawani likhna

log kya likhte hain kya paDhte hain is shahr mein ab

raij-ul-waqt adibon ki kahani likhna

'ilm ka bojh ghazal itna nahin sah sakti

haiat-e-nazm mein apni hama-dani likhna

isti'are mein 'alamat mein ishaare mein kahin

aas ki yas ki bharpur jawani likhna

aabshaaron ka junun samne rakh kar 'wasfi'

chaDhte dariya ki bracket mein rawani likhna