اب کسی پر نظر نہیں جاتی

اب کسی پر نظر نہیں جاتی

ایک صورت مگر نہیں جاتی

یہ صدائے فقیر اس دل تک

جانے کیا سوچ کر نہیں جاتی

وہ گزرتی ضرور ہے دل سے

پر وہ دل سے گزر نہیں جاتی

چھوڑ آئے ہیں وہ گلی لیکن

وہ گلی چھوڑ کر نہیں جاتی

ایک لمحہ کبھی نہیں آتا

اک گھڑی عمر بھر نہیں جاتی

ساتھ چلتی ہے ساتھ چلنے تک

ٹھیرنے پر ٹھہر نہیں جاتی

ایک آواز ایک ہی آواز

جو کبھی بے اثر نہیں جاتی

عشق کے ساتھ عقل بھی مومنؔ

اب کسی اور در نہیں جاتی