ab kisi par nazar nahin jati

ab kisī par nazar nahīñ jaatī

ek sūrat magar nahīñ jaatī

ye sadā-e-faqīr us dil tak

jaane kyā soch kar nahīñ jaatī

vo guzartī zarūr hai dil se

par vo dil se guzar nahīñ jaatī

chhoḌ aa.e haiñ vo galī lekin

vo galī chhoḌ kar nahīñ jaatī

ek lamha kabhī nahīñ aatā

ik ghaḌī 'umr-bhar nahīñ jaatī

saath chaltī hai saath chalne tak

Therne par Thahar nahīñ jaatī

ek āvāz ek hī āvāz

jo kabhī be-asar nahīñ jaatī

'ishq ke saath 'aql bhī 'momin'

ab kisī aur dar nahīñ jaatī

ab kisi par nazar nahin jati

ek surat magar nahin jati

ye sada-e-faqir us dil tak

jaane kya soch kar nahin jati

wo guzarti zarur hai dil se

par wo dil se guzar nahin jati

chhoD aae hain wo gali lekin

wo gali chhoD kar nahin jati

ek lamha kabhi nahin aata

ek ghaDi 'umr-bhar nahin jati

sath chalti hai sath chalne tak

Therne par Thahar nahin jati

ek aawaz ek hi aawaz

jo kabhi be-asar nahin jati

'ishq ke sath 'aql bhi 'momin'

ab kisi aur dar nahin jati