ab koi aarzu nahin zauq-e-payam ke siwa

ab koī aarzū nahīñ zauq-e-payām ke sivā

ab koī justujū nahīñ shauq-e-salām ke sivā

koī sharīk-e-ġham nahīñ ab tirī yaad ke baġhair

koī anīs-e-dil nahīñ ab tire naam ke sivā

terī nigāh-e-mast se mujh pe ye raaz khul gayā

aur bhī gardisheñ haiñ kuchh gardish-e-jām ke sivā

ḳhvāhish-e-ārzū sahī hāsil-e-zindagī magar

hāsil-e-ārzū hai kyā soz-e-mudām ke sivā

aah koī na kar sakā chāra-e-talḳhī-e-firāq

nāla-e-sub.h ke baġhair giriya-e-shām ke sivā

rañg-e-bahār par na bhuul bu-e-chaman se dar-guzar

ye bhī haiñ ḳhush-numā fareb dāna-o-dām ke sivā

mar ke hayāt-e-jāvidāñ ishq ko mil ga.ī 'hafīz'

jī ke havas ko kyā milā marg-e-davām ke sivā

ab koi aarzu nahin zauq-e-payam ke siwa

ab koi justuju nahin shauq-e-salam ke siwa

koi sharik-e-gham nahin ab teri yaad ke baghair

koi anis-e-dil nahin ab tere nam ke siwa

teri nigah-e-mast se mujh pe ye raaz khul gaya

aur bhi gardishen hain kuchh gardish-e-jam ke siwa

KHwahish-e-arzu sahi hasil-e-zindagi magar

hasil-e-arzu hai kya soz-e-mudam ke siwa

aah koi na kar saka chaara-e-talKHi-e-firaq

nala-e-subh ke baghair giriya-e-sham ke siwa

rang-e-bahaar par na bhul bu-e-chaman se dar-guzar

ye bhi hain KHush-numa fareb dana-o-dam ke siwa

mar ke hayat-e-jawidan ishq ko mil gai 'hafiz'

ji ke hawas ko kya mila marg-e-dawam ke siwa