ab koi baat mulaqat pe mat chhoDiyega

ab koī baat mulāqāt pe mat chhoḌiyegā

haal kah dījegā hālāt pe mat chhoḌiyegā

gaate rahiyegā kaḌī dhuup meñ bhī naġhma-e-ishq

ab junūñ mausam-e-barsāt pe mat chhoḌiyegā

chashm-e-hairat meñ namī rakhiyegā vijdān kī bhī

raaz saare hī karāmāt pe mat chhoḌiyegā

shahr meñ rakhiyegā kuchh peḌ lagāne kī jagah

ye farīza bhī mazāfāt pe mat chhoḌiyegā

yaar jab dhyān meñ aa jaa.e vahīñ kījiye raqs

jashn ab sūrat-e-hālāt pe mat chhoḌiyegā

be-sabab TuuT bhī jaatī hai kabhī baat kahīñ

dost achchhā ho to is baat pe mat chhoḌiyegā

jo bhī honā hai vo ho kar hī rahegā 'haidar'

ya.anī dil vahm-o-ḳhayālāt pe mat chhoḌiyegā

ab koi baat mulaqat pe mat chhoDiyega

haal kah dijega haalat pe mat chhoDiyega

gate rahiyega kaDi dhup mein bhi naghma-e-ishq

ab junun mausam-e-barsat pe mat chhoDiyega

chashm-e-hairat mein nami rakhiyega wijdan ki bhi

raaz sare hi karamat pe mat chhoDiyega

shahr mein rakhiyega kuchh peD lagane ki jagah

ye fariza bhi mazafat pe mat chhoDiyega

yar jab dhyan mein aa jae wahin kijiye raqs

jashn ab surat-e-haalat pe mat chhoDiyega

be-sabab TuT bhi jati hai kabhi baat kahin

dost achchha ho to is baat pe mat chhoDiyega

jo bhi hona hai wo ho kar hi rahega 'haidar'

yani dil wahm-o-KHayalat pe mat chhoDiyega