ab koi hujjat nahin iqrar ko inkar se

ab koī hujjat nahīñ iqrār ko inkār se

ishq ne paalī farāġhat husn kī sarkār se

is adā-e-be-niyāzī par hai hairāñ aañkh bhī

aa ga.e dil meñ magar pūchhā na pahre-dār se

gard-ālūda thiiñ āñkheñ intizār-e-dost meñ

dhul rahī haiñ vasl meñ vo āñsuoñ kī dhaar se

vāpsī hogī vahīñ par is kā andāza na thā

nāchtā nañgā chalā thā aadmī jab ġhaar se

lafz meñ jaadū nahīñ hai ik haqīqat hai janāb

ham hifāzat kar rahe haiñ kāġhzī talvār se

nikhat-o-shādābī-e-gul hai chaman kā imtiyāz

aadmī pahchānā jaatā hai faqat kirdār se

mujh se us kī bad-gumānī garche poshīda nahīñ

baat bantī hai 'asar' kī bāhamī guftār se

ab koi hujjat nahin iqrar ko inkar se

ishq ne pali faraghat husn ki sarkar se

is ada-e-be-niyazi par hai hairan aankh bhi

aa gae dil mein magar puchha na pahre-dar se

gard-aluda thin aankhen intizar-e-dost mein

dhul rahi hain wasl mein wo aansuon ki dhaar se

wapsi hogi wahin par is ka andaza na tha

nachta nanga chala tha aadmi jab ghaar se

lafz mein jadu nahin hai ek haqiqat hai janab

hum hifazat kar rahe hain kaghzi talwar se

nikhat-o-shadabi-e-gul hai chaman ka imtiyaz

aadmi pahchana jata hai faqat kirdar se

mujh se us ki bad-gumani garche poshida nahin

baat banti hai 'asar' ki bahami guftar se