ab kya bataun dard kahan tha kahan na tha

ab kyā batā.ūñ dard kahāñ thā kahāñ na thā

pūchhī vo baat yaar ne jis kā gumāñ na thā

is se ziyāda hāsil-e-umr-e-ravāñ na thā

terā nishāñ jo paayā to apnā nishāñ na thā

duniyā ho yā hujūm-e-qayāmat ho yā ki hashr

tere ḳharāb-e-ishq kā charchā kahāñ na thā

dekhī qafas se jā ke chaman meñ jafā-e-charḳh

sab ke to āshiyāñ the mirā āshiyāñ na thā

aatā nazar thā duur se nazdīk kārvāñ

nazdīk ham hue to kahīñ kārvāñ na thā

aayā nazar na phir bhī jahāñ meñ kisī ko tū

har chand tere jalve se ḳhālī jahāñ na thā

kaisī bahār kis kā chaman fasl-e-gul thī kyā

duniyā nazar meñ hech thī jab āshiyāñ na thā

be-parda is tarah kabhī hāsil thā lutf-e-dīd

hastī kā bhī hijāb mire darmiyāñ na thā

bijlī pe kī nazar to falak par thī jā chukī

dekhā jo āshiyāñ kī taraf āshiyāñ na thā

har zarra-e-jahāñ pe thā ābād ik jahāñ

hastī kā koī zarra bhī to rā.egāñ na thā

'afqar' ma.āl-e-hastī-e-fānī thā bas yahī

kal tak thā naam aaj lahad kā nishāñ na thā

ab kya bataun dard kahan tha kahan na tha

puchhi wo baat yar ne jis ka guman na tha

is se ziyaada hasil-e-umr-e-rawan na tha

tera nishan jo paya to apna nishan na tha

duniya ho ya hujum-e-qayamat ho ya ki hashr

tere KHarab-e-ishq ka charcha kahan na tha

dekhi qafas se ja ke chaman mein jafa-e-charKH

sab ke to aashiyan the mera aashiyan na tha

aata nazar tha dur se nazdik karwan

nazdik hum hue to kahin karwan na tha

aaya nazar na phir bhi jahan mein kisi ko tu

har chand tere jalwe se KHali jahan na tha

kaisi bahaar kis ka chaman fasl-e-gul thi kya

duniya nazar mein hech thi jab aashiyan na tha

be-parda is tarah kabhi hasil tha lutf-e-did

hasti ka bhi hijab mere darmiyan na tha

bijli pe ki nazar to falak par thi ja chuki

dekha jo aashiyan ki taraf aashiyan na tha

har zarra-e-jahan pe tha aabaad ek jahan

hasti ka koi zarra bhi to raegan na tha

'afqar' maal-e-hasti-e-fani tha bas yahi

kal tak tha nam aaj lahad ka nishan na tha