ab kya karunga ya-rab tera jahan le kar

ab kyā karūñgā yā-rab terā jahān le kar

dhartī pe maiñ khaḌā huuñ ik āsmān le kar

va.adoñ kī anjuman meñ kuchh fā.eda nahīñ hai

apnī zabān de kar merī zabān le kar

har shai dikhā.ī detī hai saaf jis kī chhat se

ham log bas ga.e haiñ aisā makān le kar

siine meñ rah na jaa.eñ mausam kī dāstāneñ

patjhaḌ ko kyā milegā phūloñ kī jaan le kar

rāh-e-vafā meñ ham ko tum ḳhuub āzmāo

ik imtihān kyā hai sau imtihān le kar

āñchal kī laaj rakhnā hosh-o-ḳhirad se aage

dīvāne baḌh rahe haiñ terā nishān le kar

is lafz-e-āshiqī meñ lākhoñ paheliyāñ haiñ

tum kyā karoge 'dilkash' ye dāstān le kar

ab kya karunga ya-rab tera jahan le kar

dharti pe main khaDa hun ek aasman le kar

wadon ki anjuman mein kuchh faeda nahin hai

apni zaban de kar meri zaban le kar

har shai dikhai deti hai saf jis ki chhat se

hum log bas gae hain aisa makan le kar

sine mein rah na jaen mausam ki dastanen

patjhaD ko kya milega phulon ki jaan le kar

rah-e-wafa mein hum ko tum KHub aazmao

ek imtihan kya hai sau imtihan le kar

aanchal ki laj rakhna hosh-o-KHirad se aage

diwane baDh rahe hain tera nishan le kar

is lafz-e-ashiqi mein lakhon paheliyan hain

tum kya karoge 'dilkash' ye dastan le kar