ab meri chashm ki tasKHir nahin hoti hai

ab mirī chashm kī tasḳhīr nahīñ hotī hai

so mirī aah meñ tāsīr nahīñ hotī hai

maiñ bhī pāband-e-salāsil nahīñ rah paatā huuñ

us kī zulfoñ se bhī zanjīr nahīñ hotī hai

vo hī aa kar kare jis se bhī ho ye vābasta

mujh se ik ḳhvāb kī ta.abīr nahīñ hotī hai

shoḳh āñkhoñ meñ jo hotī hai raqam ḳhushbū se

aisī tasnīf kī tafsīr nahīñ hotī hai

ai zamāne maiñ gunahgār nahīñ bas mujh se

apne haq meñ kabhī taqrīr nahīñ hotī hai

usī dīvār kī tasvīr Darātī hai mujhe

vo hī jis par koī tasvīr nahīñ hotī hai

ḳhud-ġharaz haath haiñ aur un meñ siyāsī naqshe

yuuñ kisī ahd kī ta.amīr nahīñ hotī hai

varaq-e-asr ki jis ko hai ibārat kā junūñ

aur ye saa.at ki jo tahrīr nahīñ hotī hai

ab meri chashm ki tasKHir nahin hoti hai

so meri aah mein tasir nahin hoti hai

main bhi paband-e-salasil nahin rah pata hun

us ki zulfon se bhi zanjir nahin hoti hai

wo hi aa kar kare jis se bhi ho ye wabasta

mujh se ek KHwab ki tabir nahin hoti hai

shoKH aankhon mein jo hoti hai raqam KHushbu se

aisi tasnif ki tafsir nahin hoti hai

ai zamane main gunahgar nahin bas mujh se

apne haq mein kabhi taqrir nahin hoti hai

usi diwar ki taswir Daraati hai mujhe

wo hi jis par koi taswir nahin hoti hai

KHud-gharaz hath hain aur un mein siyasi naqshe

yun kisi ahd ki tamir nahin hoti hai

waraq-e-asr ki jis ko hai ibarat ka junun

aur ye saat ki jo tahrir nahin hoti hai