اب مری چشم کی تسخیر نہیں ہوتی ہے

اب مری چشم کی تسخیر نہیں ہوتی ہے

سو مری آہ میں تاثیر نہیں ہوتی ہے

میں بھی پابند سلاسل نہیں رہ پاتا ہوں

اس کی زلفوں سے بھی زنجیر نہیں ہوتی ہے

وہ ہی آ کر کرے جس سے بھی ہو یہ وابستہ

مجھ سے اک خواب کی تعبیر نہیں ہوتی ہے

شوخ آنکھوں میں جو ہوتی ہے رقم خوشبو سے

ایسی تصنیف کی تفسیر نہیں ہوتی ہے

اے زمانہ میں گنہ گار نہیں بس مجھ سے

اپنے حق میں کبھی تقریر نہیں ہوتی ہے

اسی دیوار کی تصویر ڈراتی ہے مجھے

وہ ہی جس پر کوئی تصویر نہیں ہوتی ہے

خود غرض ہاتھ ہیں اور ان میں سیاسی نقشے

یوں کسی عہد کی تعمیر نہیں ہوتی ہے

ورق عصر کہ جس کو ہے عبارت کا جنوں

اور یہ ساعت کہ جو تحریر نہیں ہوتی ہے