ab misr mein kahan koi bazar moatabar

ab misr meñ kahāñ koī bāzār mo'atabar

yūsuf hī mo'atabar na ḳharīdār mo'atabar

aise meñ sochtā huuñ kise mo'atabar kahūñ

miltā nahīñ hai jab koī kirdār mo'atabar

rahzan chhupe hue haiñ pas-e-sañg-e-mīl-e-rāh

mutlaq nahīñ hai sāya-e-ashjār mo'atabar

tārīk shab hai aur larazte hue charāġh

lagte nahīñ haiñ sub.h ke āsār mo'atabar

kahne ko sarfarosh the jāñbāz the bahut

Thahre akele ham hī sar-e-dār mo'atabar

mahfil meñ ahl-e-fan bhī ye kahne lage 'habāb'

puḳhta tirā suḳhan tire ash.ār mo'atabar

ab misr mein kahan koi bazar mo'atabar

yusuf hi mo'atabar na KHaridar mo'atabar

aise mein sochta hun kise mo'atabar kahun

milta nahin hai jab koi kirdar mo'atabar

rahzan chhupe hue hain pas-e-sang-e-mil-e-rah

mutlaq nahin hai saya-e-ashjar mo'atabar

tarik shab hai aur larazte hue charagh

lagte nahin hain subh ke aasar mo'atabar

kahne ko sarfarosh the jaanbaz the bahut

Thahre akele hum hi sar-e-dar mo'atabar

mahfil mein ahl-e-fan bhi ye kahne lage 'habab'

puKHta tera suKHan tere ashaar mo'atabar