ab mujhko gale lagao sahib

ab mujh ko gale lagāo sāhib

yak shab kahīñ tum bhī aao sāhib

rūThā huuñ jo tum se maiñ to mujh ko

aa kar ke tumhīñ manāo sāhib

baiThe raho mere sāmne tum

az bahr-e-ḳhudā na jaao sāhib

kuchh ḳhuub nahīñ ye kaj-adā.ī

har lahza na bhauñ chaḌhāo sāhib

rakhte nahīñ parda ġhair se tum

jhūTī qasmeñ na khaao sāhib

dar-guzre ham aisī zindagī se

itnā bhī na jī jalāo sāhib

yā ġhair kī chaah bhuul jaao

yā dil se hameñ bhulāo sāhib

tum vaqt ke apne ho masīhā

murde ke ta.iiñ jilāo sāhib

miyāñ-'mus.hafī' yaar aa milegā

itnā bhī na tilmilāo sāhib

ab mujh ko gale lagao sahib

yak shab kahin tum bhi aao sahib

ruTha hun jo tum se main to mujh ko

aa kar ke tumhin manao sahib

baiThe raho mere samne tum

az bahr-e-KHuda na jao sahib

kuchh KHub nahin ye kaj-adai

har lahza na bhaun chaDhao sahib

rakhte nahin parda ghair se tum

jhuTi qasmen na khao sahib

dar-guzre hum aisi zindagi se

itna bhi na ji jalao sahib

ya ghair ki chah bhul jao

ya dil se hamein bhulao sahib

tum waqt ke apne ho masiha

murde ke tain jilao sahib

miyan-'mushafi' yar aa milega

itna bhi na tilmilao sahib