ab mujhko kya KHabar wo yahan hai bhi ya nahin

ab mujh ko kyā ḳhabar vo yahāñ hai bhī yā nahīñ

har ik se shahr meñ to mirā rābta nahīñ

jannat banā to sakte haiñ is kā.enāt ko

lekin mirī tarah se koī sochtā nahīñ

jis rahguzar pe phuul saje haiñ mire liye

ai pā-e-shauq ab vo mirā rāsta nahīñ

zāhir se mutma.in hai mire aur ik naqāb

chehre pe jo paḌā hai use dekhtā nahīñ

jab tak thī dil meñ saañs bhī ḳhushbū banī rahī

hoñToñ pe aa ke baat meñ ab kuchh rahā nahīñ

ik vaqt thā ki raah guzarnā muhāl thā

ab muḌ ke rāste meñ koī dekhtā nahīñ

ab shaam ho ga.ī hai mujhe sonā chāhiye

sūraj tire ḳhayāl kā garche Dhalā nahīñ

ab mujh ko kya KHabar wo yahan hai bhi ya nahin

har ek se shahr mein to mera rabta nahin

jannat bana to sakte hain is kaenat ko

lekin meri tarah se koi sochta nahin

jis rahguzar pe phul saje hain mere liye

ai pa-e-shauq ab wo mera rasta nahin

zahir se mutmain hai mere aur ek naqab

chehre pe jo paDa hai use dekhta nahin

jab tak thi dil mein sans bhi KHushbu bani rahi

honTon pe aa ke baat mein ab kuchh raha nahin

ek waqt tha ki rah guzarna muhaal tha

ab muD ke raste mein koi dekhta nahin

ab sham ho gai hai mujhe sona chahiye

suraj tere KHayal ka garche Dhala nahin