ab na taDpae fareb-e-gham-e-hijran mujhko

ab na taḌpā.e fareb-e-ġham-e-hijrāñ mujh ko

nazar aate haiñ vo rag rag meñ ḳhirāmāñ mujh ko

jaan kar us ne charāġh-e-shab-e-hijrāñ mujh ko

kar diyā sub.h-e-azal hī se farozāñ mujh ko

ab kahāñ jā.ūñ batā gardish-e-daurāñ mujh ko

har taraf milne lagī manzil-e-jānāñ mujh ko

mujh se raushan hai har ik gosha-e-imkān-e-hayāt

phir bhī kahte haiñ charāġh-e-tah-e-dāmāñ mujh ko

duur hotā hai kahīñ dil se nasheman kā ḳhayāl

bhuul saktī hai koī barq-e-gulistāñ mujh ko ko

arsa-e-shauq pe chhātā hī chalā jaatā huuñ

le ke ubhrā hai tirā husn-e-numāyāñ mujh ko

dekhiye phir mire jazbāt-e-junūñ kī lahreñ

kah to de koī zarā nang-e-garebāñ mujh ko

aah vo dil ki jise dard kī lazzat na milī

haa.e vo dard ki jis kā huā armāñ mujh ko

maiñ vahī rāz-e-haqīqat huuñ ki barsoñ 'bāsit'

parda-e-kufr meñ DhūñDā kiyā īmāñ mujh ko

ab na taDpae fareb-e-gham-e-hijran mujh ko

nazar aate hain wo rag rag mein KHiraman mujh ko

jaan kar us ne charagh-e-shab-e-hijran mujh ko

kar diya subh-e-azal hi se farozan mujh ko

ab kahan jaun bata gardish-e-dauran mujh ko

har taraf milne lagi manzil-e-jaanan mujh ko

mujh se raushan hai har ek gosha-e-imkan-e-hayat

phir bhi kahte hain charagh-e-tah-e-daman mujh ko

dur hota hai kahin dil se nasheman ka KHayal

bhul sakti hai koi barq-e-gulistan mujh ko ko

arsa-e-shauq pe chhata hi chala jata hun

le ke ubhra hai tera husn-e-numayan mujh ko

dekhiye phir mere jazbaat-e-junun ki lahren

kah to de koi zara nang-e-gareban mujh ko

aah wo dil ki jise dard ki lazzat na mili

hae wo dard ki jis ka hua arman mujh ko

main wahi raaz-e-haqiqat hun ki barson 'basit'

parda-e-kufr mein DhunDa kiya iman mujh ko