ab qabu mein dil kyun aae ab aankhon mein dam kyon Thahre

ab qaabū meñ dil kyuuñ aa.e ab āñkhoñ meñ dam kyoñ Thahre

jis bastī meñ vo rahtā thā us bastī meñ ham kyuuñ Thahre

jo ras aur bū se aarī ho jis phuul kī dhuup se yaarī ho

us phuul pe bhañvrā kyuuñ Dole us phuul pe shabnam kyuuñ Thahre

kyuuñ vaid hakīm badalte ho kyuuñ kuḌhte ho kyuuñ jalte ho

risnā hī muqaddar ho jis kā us zaḳhm pe marham kyuuñ Thahre

ham ranj-pasandoñ ġham-ḳhvāroñ shorīda-saroñ ke kahne par

aa.ī huī rut kyuuñ ruk jaa.e jaatā huā mausam kyuuñ Thahre

jo motī us kī palkoñ par jhalkeñ vo kyuuñ anmol baneñ

jo chhalkeñ hamārī āñkhoñ se qīmat un kī kam kyuuñ Thahre

patjhaḌ meñ mausam-e-gul meñ bhī rone par bhī hañsne par bhī

ham log hī kyuuñ zanjīr hue ham log hī mulzim kyuuñ Thahre

jab shahr meñ mujh jaise ḳhush-go ġham-parvar aur bhī haiñ us ko

kyuuñ aa.e 'nazar' dar merā hī ghar mere har ġham kyuuñ Thahre

ab qabu mein dil kyun aae ab aankhon mein dam kyon Thahre

jis basti mein wo rahta tha us basti mein hum kyun Thahre

jo ras aur bu se aari ho jis phul ki dhup se yari ho

us phul pe bhanwra kyun Dole us phul pe shabnam kyun Thahre

kyun waid hakim badalte ho kyun kuDhte ho kyun jalte ho

risna hi muqaddar ho jis ka us zaKHm pe marham kyun Thahre

hum ranj-pasandon gham-KHwaron shorida-saron ke kahne par

aai hui rut kyun ruk jae jata hua mausam kyun Thahre

jo moti us ki palkon par jhalken wo kyun anmol banen

jo chhalken hamari aankhon se qimat un ki kam kyun Thahre

patjhaD mein mausam-e-gul mein bhi rone par bhi hansne par bhi

hum log hi kyun zanjir hue hum log hi mulzim kyun Thahre

jab shahr mein mujh jaise KHush-go gham-parwar aur bhi hain us ko

kyun aae 'nazar' dar mera hi ghar mere har gham kyun Thahre