ab qabile ki riwayat hai bikharne wali

ab qabīle kī rivāyat hai bikharne vaalī

har nazar ḳhud meñ koī shahr hai bharne vaalī

ḳhush-gumānī ye huī suukh gayā jab dariyā

ret se ab mirī kashtī hai ubharne vaalī

ḳhushbuoñ ke na.e jhoñke haiñ har ik dhaḌkan meñ

kaun sī rut hai mire dil meñ Thaharne vaalī

kuchh parinde haiñ magan mausamī parvāzoñ meñ

ek āñdhī hai par-o-bāl katarne vaalī

ham bhī ab siikh ga.e sabz pasīne kī zabāñ

sañg-zāroñ kī jabīneñ haiñ sañvarne vaalī

tez dhun par the sabhī raqs meñ kyuuñ kar sunte

chand lamhoñ meñ balā.eñ thiiñ utarne vaalī

bas usī vaqt ka.ī jvālā-mukhī phuuT paḌe

motiyoñ se mirī har naav thī bharne vaalī

Dhak liyā chāñd ke chehre ko siyah bādal ne

chāñdnī thī mire āñgan meñ utarne vaalī

daf.atan TuuT paḌe chand bagūle 'amabar'

ḳhushbueñ thiiñ mirī bastī se guzarne vaalī

ab qabile ki riwayat hai bikharne wali

har nazar KHud mein koi shahr hai bharne wali

KHush-gumani ye hui sukh gaya jab dariya

ret se ab meri kashti hai ubharne wali

KHushbuon ke nae jhonke hain har ek dhaDkan mein

kaun si rut hai mere dil mein Thaharne wali

kuchh parinde hain magan mausami parwazon mein

ek aandhi hai par-o-baal katarne wali

hum bhi ab sikh gae sabz pasine ki zaban

sang-zaron ki jabinen hain sanwarne wali

tez dhun par the sabhi raqs mein kyun kar sunte

chand lamhon mein balaen thin utarne wali

bas usi waqt kai jwala-mukhi phuT paDe

motiyon se meri har naw thi bharne wali

Dhak liya chand ke chehre ko siyah baadal ne

chandni thi mere aangan mein utarne wali

dafatan TuT paDe chand bagule 'amabar'

KHushbuen thin meri basti se guzarne wali