ab rahe ya na rahe koi malal-e-duniya

ab rahe yā na rahe koī malāl-e-duniyā

khīñchtī hai mirā dil chashm-e-ġhazāl-e-duniyā

lo utartī hai badan se mire ḳhākī poshāk

lo huā jaatā huuñ maiñ sarf-e-kamāl-e-duniyā

miT rahe haiñ mire andar ke sabhī naqsh-o-nigār

ban rahe haiñ mire bāhar ḳhad-o-ḳhāl-e-duniyā

tere chehre kā fusūñ bhī nazar aa.e to kahīñ

koī ā.īnā dikhātā hai jamāl-e-duniyā

bas yahī naḳhl-e-havas hai jo rahegā sarsabz

tirā iqbāl sivā taaza nihāl-e-duniyā

maiñ bhī hairān mirā dil bhī pashīmān sā hai

jism ke haath huā jab se visāl-e-duniyā

ab rahe ya na rahe koi malal-e-duniya

khinchti hai mera dil chashm-e-ghazal-e-duniya

lo utarti hai badan se mere KHaki poshak

lo hua jata hun main sarf-e-kamal-e-duniya

miT rahe hain mere andar ke sabhi naqsh-o-nigar

ban rahe hain mere bahar KHad-o-KHal-e-duniya

tere chehre ka fusun bhi nazar aae to kahin

koi aaina dikhata hai jamal-e-duniya

bas yahi naKHl-e-hawas hai jo rahega sarsabz

tera iqbaal siwa taza nihaal-e-duniya

main bhi hairan mera dil bhi pashiman sa hai

jism ke hath hua jab se visal-e-duniya