اب تک جو اندر تھی باہر رکھ دی ہے

اب تک جو اندر تھی باہر رکھ دی ہے

میز پہ اک تصویر سجا کر رکھ دی ہے

تم چاہو تو اپنی رات جواں کر لو

میں نے اپنی رات بجھا کر رکھ دی ہے

کون آیا تھا آخر میرے کمرے میں

کس نے ہر اک چیز سجا کر رکھ دی ہے

ایک اداسی کم تھی کیا جو اب میں نے

اک ہنستی تصویر بھی لا کر رکھ دی ہے

اس سے دل کی بات تو کہہ آیا ہوں میں

لیکن جلتی چیز ہوا پر رکھ دی ہے

ننگے پتوں کے تن پر جانے کس نے

رات گئے اک برف کی چادر رکھ دی ہے

جس کو ڈھونڈ رہا ہوں میں سارے گھر میں

میں نے ہی وہ چیز چھپا کر رکھ دی ہے