ab tak the wabasta jo alfaz ke tanon-banon se

ab tak the vābasta jo alfāz ke tānoñ-bānoñ se

apnī qīmat maañg rahe haiñ be-qadre insānoñ se

maujoñ ke qirtās pe dekho dast-e-qudrat kā aalam

ek maqāla likhtā hai vo kitne hī unvānoñ se

jab se hai siine ke andar har-sū taarī sannāTā

vahshat hai na ḳhauf rahā hai is dil ko vīrānoñ se

kitne hī ḳhurshīd agarche ummīdoñ ke Duub chuke

ek diyā rakkhā hai raushan laḌne ko tūfānoñ se

us kī yādoñ se tum ab tak muñh ko pher ke baiThe ho

aise kab rūThā karte haiñ ghar aa.e mehmānoñ se

us ne bhī halqe meñ apne farzānoñ ko DhūñD liyā

ham ne bhī kar lī hai sangat sahrā meñ dīvānoñ se

ham to patthar kī bastī meñ shīshoñ ke rakhvāle haiñ

zaḳhmoñ kī ta.adād na pūchho ham jaise nā-dānoñ se

miTTī meñ dafnā kar aise jhaaḌ rahe haiñ haath sabhī

bojh utārā hai rishtoñ kā jaise apne shānoñ se

rindoñ se ab maiḳhāne kā pūchho na ahvāl 'shakīl'

rishta jab tum toḌ chuke ho saaqī se paimānoñ se

ab tak the wabasta jo alfaz ke tanon-banon se

apni qimat mang rahe hain be-qadre insanon se

maujon ke qirtas pe dekho dast-e-qudrat ka aalam

ek maqala likhta hai wo kitne hi unwanon se

jab se hai sine ke andar har-su tari sannaTa

wahshat hai na KHauf raha hai is dil ko viranon se

kitne hi KHurshid agarche ummidon ke Dub chuke

ek diya rakkha hai raushan laDne ko tufanon se

us ki yaadon se tum ab tak munh ko pher ke baiThe ho

aise kab ruTha karte hain ghar aae mehmanon se

us ne bhi halqe mein apne farzanon ko DhunD liya

hum ne bhi kar li hai sangat sahra mein diwanon se

hum to patthar ki basti mein shishon ke rakhwale hain

zaKHmon ki tadad na puchho hum jaise na-danon se

miTTi mein dafna kar aise jhaD rahe hain hath sabhi

bojh utara hai rishton ka jaise apne shanon se

rindon se ab maiKHane ka puchho na ahwal 'shakil'

rishta jab tum toD chuke ho saqi se paimanon se