اب تلخئ غم میں اے ہمدم اک گونہ حلاوت ہوتی ہے

اب تلخئ غم میں اے ہمدم اک گونہ حلاوت ہوتی ہے

اب درد میں کچھ کچھ میرے لئے تسکین کی صورت ہوتی ہے

رہتا ہے گزر گاہ دل پر مصروف خرام ناز کوئی

قد فتنۂ محشر ہوتا ہے اور چال قیامت ہوتی ہے

دریائے تلاطم خیز میں ہم موجوں کے سہارے جیتے ہیں

طوفاں کے تھپیڑوں سے پختہ انسان کی فطرت ہوتی ہے

کیا ان کو سنائیں قصۂ غم وہ اب تک یہ سمجھے ہی نہیں

کیا غم کا فسانہ ہوتا ہے کیا غم کی حکایت ہوتی ہے

اب آپ کے ہونٹوں پر اک پر اسرار تبسم رہتا ہے

اور آنکھوں میں اک ہلکی سی معصوم شرارت ہوتی ہے

اب دیکھیے کیا انجام رہے امید کا دامن چھوٹ گیا

اب ترک محبت پر مائل افتاد طبیعت ہوتی ہے

میں اکثر خود کو رونے پر آمادہ پا کر ہنستا ہوں

لیکن کبھی یوں بھی ہوتا ہے بے ساختہ رقت ہوتی ہے