ab talKHi-e-gham mein ai hamdam ek guna halawat hoti hai

ab talḳhī-e-ġham meñ ai hamdam ik guuna halāvat hotī hai

ab dard meñ kuchh kuchh mere liye taskīn kī sūrat hotī hai

rahtā hai guzargāh-e-dil par masrūf-e-ḳhirām-e-nāz koī

qad fitna-e-mahshar hotā hai aur chaal qayāmat hotī hai

dariyā-e-talātum-ḳhez meñ ham maujoñ ke sahāre jiite haiñ

tūfāñ ke thapeḌoñ se puḳhta insān kī fitrat hotī hai

kyā un ko sunā.eñ qissa-e-ġham vo ab tak ye samjhe hī nahīñ

kyā ġham kā fasāna hotā hai kyā ġham kī hikāyat hotī hai

ab aap ke hoñToñ par ik pur-asrār tabassum rahtā hai

aur āñkhoñ meñ ik halkī sī ma.asūm sharārat hotī hai

ab dekhiye kyā anjām rahe ummīd kā dāman chhūT gayā

ab tark-e-mohabbat par maa.il uftād-e-tabī.at hotī hai

maiñ aksar ḳhud ko rone par āmāda pā kar hañstā huuñ

lekin kabhī yuuñ bhī hotā hai be-sāḳhta riqqat hotī hai

ab talKHi-e-gham mein ai hamdam ek guna halawat hoti hai

ab dard mein kuchh kuchh mere liye taskin ki surat hoti hai

rahta hai guzargah-e-dil par masruf-e-KHiram-e-naz koi

qad fitna-e-mahshar hota hai aur chaal qayamat hoti hai

dariya-e-talatum-KHez mein hum maujon ke sahaare jite hain

tufan ke thapeDon se puKHta insan ki fitrat hoti hai

kya un ko sunaen qissa-e-gham wo ab tak ye samjhe hi nahin

kya gham ka fasana hota hai kya gham ki hikayat hoti hai

ab aap ke honTon par ek pur-asrar tabassum rahta hai

aur aankhon mein ek halki si masum shararat hoti hai

ab dekhiye kya anjam rahe ummid ka daman chhuT gaya

ab tark-e-mohabbat par mail uftad-e-tabiat hoti hai

main aksar KHud ko rone par aamada pa kar hansta hun

lekin kabhi yun bhi hota hai be-saKHta riqqat hoti hai