ab to aisa koi manzar bhi dikhaya jae

ab to aisā koī manzar bhī dikhāyā jaa.e

jis se rote hue bachchoñ ko hañsāyā jaa.e

jurm duniyā meñ yahī sab se baḌā hai ba-ḳhudā

dil kisī kā kabhī hargiz na dukhāyā jaa.e

atomī bam ke dhamākoñ meñ pale bachchoñ ko

kaise miTTī ke khilaunoñ se lubhāyā jaa.e

kitne ma.asūm haiñ bhole se ye raushan chehre

in ko rauñdā nahīñ palkoñ pe biThāyā jaa.e

vaqt-e-ruḳhsat ye kahā phuul ne ik bulbul se

kuchh to me.ār-e-vafā aur baḌhāyā jaa.e

ab 'shagufta' ko jo ta.abīr se Dar lagtā hai

us kī āñkhoñ se har ik ḳhvāb churāyā jaa.e

ab to aisa koi manzar bhi dikhaya jae

jis se rote hue bachchon ko hansaya jae

jurm duniya mein yahi sab se baDa hai ba-KHuda

dil kisi ka kabhi hargiz na dukhaya jae

atomi bam ke dhamakon mein pale bachchon ko

kaise miTTi ke khilaunon se lubhaya jae

kitne masum hain bhole se ye raushan chehre

in ko raunda nahin palkon pe biThaya jae

waqt-e-ruKHsat ye kaha phul ne ek bulbul se

kuchh to mear-e-wafa aur baDhaya jae

ab 'shagufta' ko jo tabir se Dar lagta hai

us ki aankhon se har ek KHwab churaya jae