اب تو بے قابو ہوئے جاتے ہیں درد دل سے ہم

اب تو بے قابو ہوئے جاتے ہیں درد دل سے ہم

کیسے گزریں گے قرار ضبط کی منزل سے ہم

دشمنوں سے دوستی کا کام ہم نے لے لیا

آج موجوں کے سہارے مل گئے ساحل سے ہم

اک ذرا سی آنکھ کے تل میں یہ قدرت ہے تری

ساری دنیا دیکھتے ہیں آنکھ کے اک تل سے ہم

خاکساری زیب ہے ہم کو نہیں شایاں غرور

گل میں مل جائیں گے ہم پیدا ہوئے ہیں گل سے ہم

شب کو تاروں دن کو دیواروں سے بہلاتے ہیں دل

کاٹتے ہیں روز و شب فرقت میں کس مشکل سے ہم

ان کا رعب حسن ہی نشترؔ حجاب حسن ہے

آنکھ اٹھا کر دیکھ سکتے ہیں انہیں مشکل سے ہم