ab to be-qabu hue jate hain dard-e-dil se hum

ab to be-qābū hue jaate haiñ dard-e-dil se ham

kaise guzreñge qarār-e-zabt kī manzil se ham

dushmanoñ se dostī kā kaam ham ne le liyā

aaj maujoñ ke sahāre mil ga.e sāhil se ham

ik zarā sī aañkh ke til meñ ye qudrat hai tirī

saarī duniyā dekhte haiñ aañkh ke ik til se ham

ḳhāksārī zeb hai ham ko nahīñ shāyāñ ġhurūr

gul meñ mil jā.eñge ham paidā hue haiñ gul se ham

shab ko tāroñ din ko dīvāroñ se bahlāte haiñ dil

kāTte haiñ roz-o-shab furqat meñ kis mushkil se ham

un kā ro.ab-e-husn hī 'nashtar' hijāb-e-husn hai

aañkh uThā kar dekh sakte haiñ unheñ mushkil se ham

ab to be-qabu hue jate hain dard-e-dil se hum

kaise guzrenge qarar-e-zabt ki manzil se hum

dushmanon se dosti ka kaam hum ne le liya

aaj maujon ke sahaare mil gae sahil se hum

ek zara si aankh ke til mein ye qudrat hai teri

sari duniya dekhte hain aankh ke ek til se hum

KHaksari zeb hai hum ko nahin shayan ghurur

gul mein mil jaenge hum paida hue hain gul se hum

shab ko taron din ko diwaron se bahlate hain dil

kaTte hain roz-o-shab furqat mein kis mushkil se hum

un ka roab-e-husn hi 'nashtar' hijab-e-husn hai

aankh uTha kar dekh sakte hain unhen mushkil se hum